Prokuroria e Posaçme Kundër Korrupsionit dhe Krimit të Organizuar (SPAK) ka paraqitur në Gjykatën e Posaçme të Shkallës së Parë kërkesën për konfiskimin e pasurive të sekuestruara në kuadër të hetimit pasuror nr.9 të vitit 2023.
Ky hetim lidhet me shtetasit Eridan Veliu, Sokol Çamer, Julian Veliu, Deljana Nebiu, Leknos Nebiu dhe persona të lidhur me ta, të cilët janë akuzuar në Belgjikë për veprat penale të “Organizatës kriminale” dhe “Pastrim të parave” sipas ligjit belg dhe Kodit Penal Shqiptar.
Pasuritë e sekuestruara janë konsideruar të pajustifikuara nga burime të ligjshme, duke sugjeruar se ato janë rezultat i veprimtarive kriminale të individëve të përfshirë. Kërkesa për konfiskimin e këtyre pasurive përfshin një numër apartamentesh, truallesh, automjetesh dhe llogarish bankare:
1. Apartamente:
– 5 apartamente në Lagjen “Uji i Ftohtë”, Vlorë, të pronësisë së Deljana Nebiu.
– Apartament në Pallat tek Diga e Liqenit, Tiranë në pronësi të Flora Nebiu.
– Apartament në Kamëz, Tiranë në pronësi të Antonela Nebiu.
2. Njësi Shërbimi dhe Truall:
– Njësi Shërbimi në Vlorë, në pronësi të Eridan Rexhep Nebiu.
– Truall dhe Banesë 1 Kat në Vlorë, në pronësi të personave të ndryshëm, përfshirë Eridan Rexhep Çamer dhe Deljana Vladimir Nebiu.
3. Automjete dhe Rimorkio:
– Automjete të markave Audi, Mercedes Benz dhe Ford, të pronësisë së Antonela Nebiu dhe Sokol Çamer.
– Rimorkio RTV e markës ELLEBI, pronë e Sokol Çamer.
4. Llogari bankare:
– Llogari bankare me një total prej 3,128,443.19 lekë dhe 12,011.62 Euro.
Kërkesa për konfiskimin e këtyre pasurive është bërë në kuadër të ligjit për parandalimin dhe goditjen e krimit të organizuar dhe pastrimit të parave, duke synuar sekuestron e pasurive që janë fituar në mënyrë të paligjshme.
