Pas përfundimit të mbledhjes së Sekretariatit të Etikës në Kuvend, mësohet se janë anuluar votimet e bëra gjatë seancës plenare të 7 marsit.
Pas mbledhjes ka reaguar dhe deputeti i Partisë Demokratike Saimir Korreshi, i cili e ka quajtur një fitore të vogël, ndërsa i bëri thirrje deputetëve të mazhorancës që të shkojnë në Kuvend dhe të votojnë ligjet.
“Sot është një fitore e vogël në dukje, por arroganca si janë bërë këto votime… Ne do tëverifikojmë të gjitha votimet sepse të tilla vendime mund të jenë marrë edhe më parë. Deputetët e mazhorancës të lënë qejfet e të vijnë të votojnë ligjet që kanë propozuar”, tha ai.
Kujtojmë se grupi parlamentar i PD-së pretendoi se të gjitha ligjet e votuara në seancën e 7 marsit duhet të shpalleshin të pavlefshme, për shkak se nuk ishte plotësuar kuorumi i nevojshëm në Kuvend.
Në seancën e 7 marsit u votuan projektligjet: “Për investimet strategjike”, “Për burimet ujore”, ndryshimet në ligjin “Për Turizmin”, projektligji për Mbrojtjen e Konkurrencës si dhe disa ndryshime në ligjin “Për arsimin dhe formimin profesional”. Pritet që këto projektligje do të votohen sërish në një seancë tjetër plenare
