Mbyllja e kufijve për shkak të pandemisë ka lënë mijëra shqiptarë jashtë kufijve.
Por, sikur mos të mjaftonte kjo ata janë ndeshur me një sërë problemesh që nisën nga riatdhesimi.
Sakaq, një ndër problemet që është denoncuar së fundmi është edhe anulimi i fluturimeve krejt pa pritur, duke lënë dhjetëra shqiptarë në mes të 4 rrugëve.
Së fundmi, rreth 300 shqiptarë kanë mbetur të bllokuar në aeroportin e Zyrihut, pasi fluturimi për në Tiranë, i cili ishte i parashikuar ditën e sotme në orën 13:40 me orën lokale, është anuluar.
Newsbomb.al raporton se shtetasit shqiptarë të bllokuar në aeroport, nuk dinë se çfarë të bëjnë pasi deri më tani nuk kanë marrë asnjë shpjegim, se çfarë ka ndodhur apo si do të vijojë situata.
Ata nuk kanë marrë ende asnjë përgjigje as nga kompania dhe as nga instancat përgjegjëse.
Kujtojmë që hapja e kufijve ajrorë me Zvicrën ishte parashikuar sot, më 15 qershor 2020.
Mirëpo, gjërat nuk kanë shkuar si duhet dhe fluturimi është anuluar papritur.
Kujtojmë se dy ditë më parë “Gazetareforma.com” raportoi për një problem të tillë, pasi kontaktuam me shqiptarë të mbetur jashtë kufijve.
Ata na thanë se fluturimet ishin anuluar në momentim e fundit dhe për më tepër, as nuk janë rimbursuar nga shteti për anulimin e paprecedentë të fluturimit të tyre.
Zyrtarisht rreth kësaj çështjeje nuk ka ende asnjë reagim, teksa që në fillim të epidemisë raste të tilla janë denoncuar pa fund në media.
Gjatë 3 muajve të pandemisë, teksa të gjithë duhet të ishin të sigurtë në shtëpinë e tyre, me qindra shqiptarë janë endur rrugëve të Europës, por jo vetëm, pasi qeveria nuk është kujtuar për ta.
Madje fillimisht, kjo e fundit refuzoi t’i lejonte të hynin të atdhe sepse i konsideroi të rrezikshëm, por më pas nisi procesin e riatdhesimit, që u shoqërua me probleme edhe më të mëdha.
