Ditën e sotme gjatë konferencës Anti-Korrupsion të mbajtur, kryeministri, EdiRama ndër të tjera pranoi problemet e administratës publike sa i takon transparencës së proceseve të tenderimit për projekte të ndryshme.
Gjithashtu ndër të tjera, kryeministri, bëri me dije se së shpejti do të ngrihej një strukturë që do të merrej vetëm me tenderimet për administratën publike.
Edi Rama: Më tutje dua të theksoj pjesë që ka të bëjë me tenderat. Është një transoformim i paimagjinueshëm nëse nisemi nga ku ka filluar kjo punë. Nëse do thonim që tenderat në Shqipëri kanë arritur transparencën e të gjithë operatorëve, ne do ishim sot jo kandidat për të çelur anëtarësimin në BE, por ne do ishim të gjithë në këmbë për anëtarësim.
Jemi në një fazë tjetër për të çliruar administratën e procesit të kontraktimit të fondeve publike përmes tenderave për të përfshirë ekspertizën e jashtme, edhe kompani ndërkombëtare në mënyrë që administrata të bëjnë administratën, dhe procesin e tenderimit ta bëjnë strukturat që kanë një profesionalizëm dhe pavarësi të madh. Problematikë është edhe paaftësia për të ndërtuar procese që janë transparente, të drejta e cilësore. Në këtë aspekt kemi shumë punë për të bërë.
Gjithashtu në fjalën e tij, kryeministri Rama tha se korrupsioni është një çështje që nuk është zhvilluar as në vendet më të zhvilluara, por sipas tij, Shqipëria ka filluar të ndahet shumë qartë nga një fazë, ku korrupsioni ishte sistem i marrëdhënieve të qytetarit me shtetin në çdo kontakt të tij me të.
