Gjatës kësaj jave do mbërrijnë në Tiranë dy delegacione nga Komisioni i Venecias, të cilët do merren me çështje të ndryshme.
Njëri do ketë në fokus informimin për paketa “Anti-Shpifje” dhe do të nisë takimet të hënën, kur do të takojë kryeparlamentarin Gramoz Ruçi dhe të gjitha palët parlamentare.
Më pas, të martën do të takojnë presidentin Meta dhe përfaqësues të institucioneve të tjera.
Ndërsa, delegacioni tjetër do mbledhë të dhëna mbi konfliktin e mazhorancës me presidentin Meta dhe kjo është hera e dytë që Venecia mbërrin në vendin tonë për këtë çështje.
Më herët, socialistët thirrën Komisionin dhe kërkuan një opinion mbi betimet e gjyqtarëve Kushtetues, pas konfiktit me Metën që nuk thirri për betim Arta Vorpsin.
Delegacioni do takojë palët të mërkurën dhe të enjten.
Në pritje të një përgjigjeje, që do jepet nga Komisioni i Venecias në mars, mazhoranca ka ndaluar në Kuvend punën për shkarkimin e Metës dhe rishikimin e ligjit të “Anti-Shpifjes”.
