Kanë kaluar më shumë se 4 muaj gjendje lufte në Ukrainë dhe Rusia nuk ndalet.
Teksa nuk mungojnë herë pas herë bombardimet në zona të ndryshme të Ukrainës, tashmë Rusia po vjedh edhe grurë.
Autoritete doganore turke kanë ndaluar një anije mallrash ruse e cila transportonte grurë, të cilin më herët Ukraina e kishte raportuar të vjedhur, thekson ambasadori i Ukrainës në Turqi.
“Kemi bashkëpunim të plotë. Anija tani është në hyrje të portit, duke u ndalur nga autoritetet doganore turke”, tha ambasadori Vasyl Bodnar për televizionin shtetëror ukrainas. Ai tha se për fatin e anijes do të vendoset pas mbledhjes së organeve kompetente që do të mbahet nesër, të hënën.
Vlen të përmendim se që nga shpërthimi i luftës në Ukrainë, pjesa më e madhe e vendeve diskutojnë se si të fitojnë pavarësinë prodhuese. Një nga pasojat e konfliktit është dhe bllokimi i furnizimit me grurë nga Ukraina duke bërë që shumë vende të mendojnë për burime alternative
Nuk ka vetëm të vrarë, të pastrehë dhe shkatërrim; pushtimi rus në Ukrainë ka shkaktuar një luftë tjetër, atë të grurit, që mund të rrezikojë furnizimin me ushqim në vende të ndryshme të botës dhe efekti i saj në çmimet e lëndëve të para mund të zgjasë shumë në kohë
