Mëngjesin e sotëm, nga porti i Brindisit është nisur anija e Marinës italiane “Libra”, me 40 emigrantë në bord, të cilët do të transferohen në qendrën e paraburgimit dhe riatdhesimit në Gjadër, Shqipëri strukturë e ngritur nga qeveria italiane për menaxhimin e emigrantëve të parregullt.
Emigrantët janë shtetas të kombësive të ndryshme, të cilët kishin mbërritur ditët e fundit në CPR-në e Brindisit, në zonën e Restincos.
Pas miratimit të dekretit të 28 marsit, qeveria italiane ka mundësuar transferimin e tyre në Shqipëri, jo vetëm për ata të ndaluar në det gjatë përpjekjes për të hyrë në territorin italian, por edhe për emigrantët që kanë marrë urdhër dëbimi nga policia dhe për të cilët gjykata ka miratuar ndalimin në një qendër paraburgimi.
Ky është një nga transferimet e para konkrete në kuadër të marrëveshjes për emigracionin mes Italisë dhe Shqipërisë.
