Problematikat në qytetin e Tiranës janë të shumta, madje ndonjëherë përfshijnë edhe nevojat bazike të jetës së qytetarëve siç është uji. Mjeku i njohur infeksionist, profesor Tritan Kalo ka vendosur të ndajë me ndjekësit e tij një shqetësim real, siç është mungesa e ujit. Në postimin e tij në rrjetin social “Facebook” nuk mungon ironia e shprehur nëpërmjet vargjeve të Nolit, “Anës detit i palarë”.
Sipas Kalos sa herë që hyn në dush e ka të pashmangshme të kujtojë vargjet e Nolit, “Anës Detit i Palarë”.
“Kohë kovidiane…31.01.2022…Ditë e javë sa më të mbarë miq, dashamirës, të afërm dhe bashkëkombas….Ka vite që vargu “Anës detit i palarë…” (“Anës lumenjve”, Th. S. Noli), më vjen ndërmënd sa herë më duhet të lahem/bëj dush ose të laj teshat në fund të javës… Uji ose nuk vjen me presionin e zakonshëm dy-tre herë në ditë, kur ai rrjedh në çezmat tona me ndihmën e një pompe, ose edhe “nuk turpërohet të mos vijë fare”….Unë jam në katin e tretë, mendoni familjet që ndodhen në dy katet sipër banesës sime…Fatmirësisht ka në shitje “letra të lagura për bebet”, të cilat na mundësojnë edhe ne “bebet e rritura” të qëndrojmë të pastër….KUR kemi hyrë në këtë pallat në Dhjetor 1962 dhe deri në Maj-Qershor 1992, të 24 orët e ditës UJI KURRË nuk mungonte në çezmat tona….RRËNOFTË DEMON-KRACIJA që na e hoqi “këtë bezdi”… Para pak vitesh u hap një kanal i cekët nën trotuaret e Rrugës “Muhamet Gjollesha”, dhe u instalua një lidhje e re me tubin qëndror të ujit në pallatin tonë, duke na u thënë se tash e tutje uji nuk do të na mungonte….BROÇKULLAT e zakonshme elektorale….” shkruan Kalo.
Ndërkohë nuk ka munguar një mesazh drejtuar kryebashkiakut të bashkisë së Tiranës, i cili është përgjegjes për problematikën në fjalë.
“Lali Eri, PUSHTOJE edhe “kështjellën e fundit që është jashtë kontrollit tënd dhe jo vetëm, FSHF-në”, POR ke marë dy herë votat edhe për 24 orë ujë në rubinetat tona, si dhe për mos shpërfytyrimin kullësor të urbanizimit të Kryeqytetit të të gjithë Shqiptarëve….”, shprehet mjeku infeksionist.
Gjithashtu ai ka një sugjerim që në platformën e Këshillimit Kombëtar të përfshihet edhe pyetja, e cila përtej ironisë së mjekut është retorike: “A doni ujë të pijshëm 24 orë në çezmat tuaja”?!?!…..
“Do sugjeroja që Pika e 13-të e Këshillimit Kombëtar të sapo hedhur në “tregun e tollovitjes mendore të Shqiptarëve”, të ishte: “A doni ujë të pijshëm 24 orë në çezmat tuaja”?!?!…..Quo vadis Shqipëria ime?!?!”, shton Tritan Kalo.
