Partia Demokratike duket se e ka një ndër prioritetet e programit të saj sportin. Për këtë arsye, kryedemokrati Lulzim Basha i ka besuar një detyrë të veçantë futbollistit të kombëtares Andi Lila.
Mësohet se Lila do të jetë koordinator kombëtar i Partisë Demokratike për sportet. Ndonëse u përfol si një nga kandidatët e mundshëm për deputet në Kavajë, Lila nuk është në listë, e me sa duket do të shërbejë në një detyrë tjetër të rëndësishme në PD.
Andi Lila u tërhoq përfundimisht nga futbolli i luajtur disa muaj më parë, për t’u bërë president i Ligës Profesioniste të Futbollit. Pas kësaj detyre, ish-futbollisti i kombëtares zgjodhi t’i bashkohej politikës.
Tashmë me Partinë Demokratike, Lila duket se ka një mision të qartë për të investuar dhe për t’i dhënë vëmendjen e duhur sportit në Shqipëri, që duket se dita-ditës po shkon drejt falimentimit. Pak javë më parë, u përfol edhe për një ligj të ri sponsorizimi për sportet në Shqipëri, por kjo gjë mbeti thjesht si draft.
Lila është një figurë që gjithmonë ka reaguar ashpër dhe ka mbrojtur çdo interes për sportin dhe tashmë, ka parë futjen në politikë si mënyrën e duhur për të çuar deri në fund misionin e tij. Dhe kreu i PD-së, Lulzim Basha, duket se do e mbështesë deri në fund, gjë që shihet edhe nga posti që i ka dhënë.
