Pasi përditësoi të dhënat rreth situatës së COVID-19 në vendin tonë, specialistja e ISHP, iu përgjigj interesit të gazetarëve.
Bino u pyet në lidhje me mundësinë për të kryer analiza për COVID-19 përveç laboratorit të ISHP dhe sa është kostoja e testimit.
Specialistja e ISHP u përgjigj, duke thënë se për momentin vetëm laboratori në ISHP është i licencuar.
Më tej ajo shtoi se Ministria e shëndetësisë, po vlerëson kapacitetet, për të vendosur dy laboratorë të tjerë, një në QSUT dhe tjetri te Sanatoriumi.
Përsa i përket mundësisë për të kryer teste në spitale private, Bino tha se nuk ka ende një vendim, ndërsa nuk foli as për kosto.
“Në bazë të ligjit ISHP ka laboratorin e referencës në lidhje me testimin për sëmundjet infektive, është i vetmi laborator që ka bërë kontrollin e cilësisë sipas të gjitha rekomandimeve dhe është i licencuar. Në lidhje me laboratorë të tjerë publik jemi duke vlerësuar kapacitetet dhe natyrisht në bazë të një protokolli aftësitë e testimit në QSUT dhe më pas tek ‘Shefqet Ndroqi’, në mënyrë që dy laboratorë të tjerë t’i nënshtrohen testimit të certifikuar. Në varësi të vlerësimit të metodave të reja të testimit do të shikojmë edhe mundësinë e testimeve të tjera në vende të tjera, pra laboratorë që janë publik. Por kjo do të kryhet në varësi të metodikave të testimit në mënyrë që qytetarëve t’i ofrojmë teste për të cilat ne nuk themi që është negativ dhe mund të dalë negativ, që kjo gjë të jetë e vlerësuar siç duhet. Natyrisht, gjykimi klinik i mjekut është një element i rëndësishëm. Përsa i përket spitaleve jo publike ende nuk ka një vendim. Komiteti është duke e vlerësuar mënyrën se si do të operojnë këto spitale dhe si do ta ofrojnë këtë testim nëse do të munden mbas procesit të verifikimit dhe vlerësimit” tha Bino.
Bilanci i COVID-19 në vendin tonë është 197 të prekur, mes të cilëve 33 të shëruar dhe 10 viktima.
Gjatë 24 orëve të fundit, nga 79 testime rezultuan pozitiv 11 persona.
Në spitalin Infektiv janë shtruar 74 pacientë, 4 prej të cilëve në terapi intensive.
