Kryeministri Edi Rama ka vizituar ditën e sotme gratë e burgosura.
Së bashku me të ishte edhe ministrja e Drejtësisë, Etilda Gjonaj.
Kjo u fundit u dha të dënuarave lajmin për amnistinë.
Më tej Gjonaj shtoi, se pas daljes nga burgu, do t’i ndihmojë gratë për të gjetur punë.
Ministrja premtoi se përveç të liruarave, do t’u qëndrojë pranë edhe grave që do mbeten në burg.
“Për ne është një ditë e veçantë. Kemi ardhur të ndajmë lajmin që ka të bëjë me amnistinë. Unë e di sa herë kam parë lotët tuaja duke kërkuar amnistinë. Unë e di sa e vështirë është për ju për faktin se keni fëmijët dhe të dashurit tuaj larg. Edhe unë, edhe stafi i drejtorisë së Përgjithshme të Burgjeve jemi munduar të heqim trishtimin Unë jam munduar që veprat tuaja t’i promovoj tek të gjitha gratë. Do të ndjek secilën nga ju që do të dalë nga burgu dhe përfitojë nga amnistia jo vetëm për të dalë nga burgu por edhe për të gjetur një punë, për të nisur një jetë të re. Ashtu si kemi qëndruar pranë jush, do vazhdoj të jem edhe për ato gra që do mbeten në institucion“, tha Gjonaj.
Pak ditë më parë, ministrja Gjonaj bëri me dije se 28 gra do t’i kalojnë jashtë festat e fundvitit, ndërsa 28 të tjera do të përfitojnë ulje e dënimit të mbetur me 1/3.
Kategoria tjetër që do të përfitojë janë të miturit dhe të moshuarit mbi 60 vjeç, që nuk janë dënuar për vepra të rënda penale.
