Ambasadorja Yuri Kim nuk ka pranuar të bëj komente lidhur me emrin e Tom Doshit pasi është pyetur në Euronews për dorëhqejen e tij nga Partia Social-Demokrate. Kim ka thënë se në respekt të vendimeve të SHBA, nuk do të ketë asnjë ndryshim në në pozitën e Ambasadës.
“Për cilin po flisni ju lutem? Ne respekt të vendimeve të SHBA ne e kemi të qartë, kemi qenë konsistentë dhe nuk ka asnjë ndryshim në pozitën tonë”, tha ambasadorja.
Ajo ka komentuar gjithashtu ecurinë e procesit të numërimit dhe tha se shpreson që të bëhet më shpejt. Kim u shpreh se deri tani ka parë bashkëpunim mes palëve.
“Kam disa raportime ku shpresohet që numërimi të bëhet më shpejt dhe nëse të dyja palët bien dakord, nuk ka arsye pse të mos përshpejtohet. Deri tani kam parë bashkëpunim”, u shpreh Yuri Kim.
Ambasadorja tha se votuesit shqiptarë e kanë bërë detyrën e tyre dhe tani është radha e numëruesve që të vijojnë me detyrën që ata kanë.
“Është detyra e liderëve politikë që të jenë të qetë dhe të mos deklarojnë fitoren. Shpresoj që numërimi të përshpejtohet, të jetë i saktë dhe të merret rezultati sa më shpejt të jetë e mundur”, ka thënë Kim.
