Qëndrime kontradiktore mund të quhen ato të përfaqësuesve gjermanë, ku kryekëshilltari i CDU-së është shprehur pro protestave, ndërsa sot ambasadorja gjermane ka dhënë një mendim tjetër.
Susanne Schütz, ka thënë se Berlini e njeh qeverinë aktuale si legjitime dhe si e tillë do vazhdojë bashkëpunimin e ngushtë me të, pavarësisht gjithçkaje.
Në një postim në rrjetet sociale, ambasadorja ka thënë se e mbështet vendimin që morën deputetët që zëvendësuan ata që u dorëhoqën dhe njëkohësisht ka shprehur mbështetjen dhe mundësitë e hapura të bashkëpunimit me ta.
Ajo që duket se e shqetëson diplomaten gjermane është reforma zgjedhore, ku ndër të tjera thotë se kërkon nga qeveria dhe deputetët e rinj të opozitën, gjetjen e një gjuhe të përbashkët.
Reagimi i plotë i ambasadores, Susanne Schütz
Shqipëria gjendet përpara vendimmarrjes të rëndësishme të Bashkimit Evropian lidhur me nisjen e bisedimeve të anëtarësimit. Ndaj tani nuk duhet humbur kohë, në mënyrë që reformat e nisura të vijojnë më tej dhe të arrihen rezultate të tjera konkrete në pesë prioritetet kyç. Përshëndes faktin që – edhe pse ngadalë – reforma në drejtësi po ecën përpara në mënyrë të pandërprerë. Ajo është një sukses; ndaj procesit të reformave nuk ka alternativë, ai është i pakthyeshëm dhe unik në rajon. E rëndësishme është që edhe Gjykata Kushtetuese dhe Gjykata e Lartë, si instrumenta të rëndësishëm korrektivë të shtetit ligjor, të mund të jenë së shpejti sërish funksionale. Në këtë kontekst përpara duhet të çohet edhe ngritja e strukturës së SPAK-ut. Ne presim hapa të tjerë përpara edhe në luftën kundër krimit të organizuar dhe korrupsionit. Të gjitha këto përpjekje janë të rëndësishme për të bindur shqiptaret dhe shqiptarët, por edhe investitorët e huaj, që drejtësia shqiptare garanton siguri ligjore.
Ne respektojmë vendimin e secilit deputet dhe të pasuesve të tyre në lista për dorëzimin, pranimin apo refuzimin e mandateve. Njëkohshëm theksoj, se në demokraci parlamenti është vendi kryesor për zhvillimin e debatit politik mes partive politike. Qeveria Federale do të vazhdojë të bashkëpunojë edhe në të ardhmen me qeverinë aktuale të legjitimuar në mënyrë demokratike si dhe mbajtësit e mandateve në Kuvend. Shprehim keqardhjen e madhe, që megjithë bashkëpunimin fillimisht të mirë mes shumicës dhe opozitës, reforma zgjedhore deri më tani nuk është miratuar. Zbatimi i rekomandimeve të OSBE/ODIHR-it mbetet një komponent i rëndësishëm në ndërtimin e një sistemi zgjedhor solid në Shqipëri, i cili do mund të gëzojë besimin e qytetarëve.
