Ambasadorja e Suedisë në Shqipëri, Elsa Hastad, ka zhvilluar ditën e sotme një takim në Shkodër me banorët e Paçramit, pjesë të Bashkisë së Vaut të Dejës. Në takimin me qytetarët ambasadorja e ka quajtur demokracinë në Shqipëri të brishtë, gjë që nënkupton që demokracia në vendin tonë është në rrezik. Ambasadorja ndër të tjera ka folur me banorët e zonës edhe për shit-blerjen e votës dhe i paralajmëroi që të kenë kujdes. Ajo ka bërë thirrje që qytetarët të marrin pjesë në procesin zgjedhor. Ambasadorja është shprehur se nuk ka dëshirë të komentoj përfshirjen e kandidatëve me të shkuar kriminale në këto zgjedhje.
“E vlerësoj demokracinë, jemi këtu në Paçram për të marrë këndvështrimin dhe perceptimin e njerëzve në lidhje me procesin zgjedhor. Nuk do flasim me banorët për shitblerjen e votës në takime, por për pjesëmarrjen e komunitetit në procesin zgjedhor. Është shqetësues fenomeni i shitblerjes së votës, duhet të keni kujdes sepse stadi në të cilin demokracia në Shqipëri ndodhet, është shumë e brishtë.
Kemi të gjithë një rol, por më të rëndësishëm e kanë qytetarët dhe shteti. Ata duhet t’u sigurojë qytetarëve një proces zgjedhor të mirëfillte. Nuk dua të komentoj për përfshirjen e kandidatëve me të shkuar kriminale në këto zgjedhje”, deklaroi ambasadorja suedeze në vendin tonë.
