Ditën e sotme Gledis Nano mori detyrën e Drejtorit të Përgjithshëm të Policisë së Shtetit. Me anë të një postimi në rrjetet sociale ambasada e Italisë në Tiranë ka uruar Gledis Nanon, ndërsa ka theksuar vendosmërinë për të forcuar më tej bashkëpunimin në luftën ndaj krimit.
Gjithashtu në postim është theksuar edhe bashkëpunimin mes forcave të rendit të Italisë dhe atyre të Shqipërisë për shtetin e së drejtës.
“Urime Kreut të ri të Policisë, Gledis Nano! Të vendosur për të forcuar më tej bashkëpunimin tashmë të shkëlqyer ndërmjet forcave të rendit të Italisë dhe atyre të Shqipërisë për shtetin e së drejtës dhe në luftën ndaj çdo lloj forme të kriminalitetit”, thuhet në një njoftim për shtyp të Ambasadës italiane.
Kujtojmë se dy ditë më parë Ardi Veliu dha dorëheqjen dhe posti i tij iu besua Gledis Nanos. Duke filluar nga dita e sotme Gledis Nano, do të jetë Drejtori i Përgjithshëm i Policisë së Shtetit. Ai ka marrë detyrën sot nga Ministri i Brendshëm Bledi Çuçi në një ceremoni zyrtare duke bërë dhe betimin për të mbajtur me nder flamurin e Policisë së Shtetit.
Nano tha se profesioni i tij nuk ishte një zgjedhje karriere, por pasion i frymëzuar nga babai ish-oficer i policisë. Nano dha edhe një mesazh për qytetarët që ta konsiderojnë policinë si partner.
