Ambasadori italian në Shqipëri, Fabrizzio Bucci ka uruar kryeministri Edi Rama dhe Partinë Socialiste për fitoren në zgjedhjet e 25 prillit. Në një postim në Tëitter ku shpërndan deklaratën e Ambasadës Italiane, Bucci shkruan se është momenti që të gjitha forcat politike të punojnë së bashku në interesë të shqiptarëve duke respektuar rezultatin zgjedhor. Po ashtu në deklaratë bëhet thirrje që të vlerësohen raportet e pretenduara të mashtrimit dhe parregullsive në përpikmëri dhe në përputhje të plotë me procedurat e Kodit Zgjedhor.
Postimi i Ambasadorit:
“Urimet e mia për Kryeministrin dhe PS-së për rezultatin zgjedhor. Urime Lulzim Bashës dhe drejtuesve të partive të tjera të opozitës që bënë një fushatë elektorale intensive.
Për të gjitha forcat politike tashmë është momenti për të punuar së bashku në interes të të gjithë shtetasve shqiptarë, duke respektuar rezultatin zgjedhor. Një opozitë e pjekur dhe e përgjegjshme është thelbësore në çdo demokraci.
Mbështetje maksimale Shqipërisë dhe institucioneve të saj për një stinë të re ku ndër përparësitë e saj të jetë çelja e negociatave të anëtarësimit në BE!
Deklarata e Ambasadës Italiane:
Ministria e Jashtme Italiane regjistroi me kënaqësi përparimin e raundit elektoral në Shqipëri i cili u zhvillua të Dielën 25 Prill. Italia përgëzon për organizimin e mirë të procesit zgjedhor, siç tregohet nga OSBE / ODIHR në raportin e saj paraprak, dhe veçanërisht për profesionalizmin dhe transparencën e treguar nga Komisioni Qendror i Zgjedhjeve dhe Komisioneri i tij Ilirjan Celibashi. Raportet e pretenduara të mashtrimit dhe parregullsive duhet të vlerësohen me përpikëri dhe në përputhje të plotë me procedurat e vendosura nga kodi zgjedhor.
Zgjedhjet të Dielën 25 Prill kontribuojnë pozitivisht në konsolidimin e proceseve demokratike në Shqipëri dhe përfaqësojnë një hap të rëndësishëm përpara në rrugën e saj drejt Evropës. Pas ballafaqimit elektoral, tani është thelbësore që të gjithë aktorët politikë të angazhohen të punojnë për të mirën e vendit, duke kontribuar në konsolidimin e institucioneve demokratike që gjejnë pikën e tyre qendrore të referencës në një Parlament plotësisht legjitim dhe funksional.
Shpresa e Italisë është që të gjitha forcat politike të punojnë në mënyrë kohezive në mbështetje të objektivit strategjik të përfaqësuar nga hyrja e Shqipërisë në Bashkimin Evropian, përmes një dialogu konstruktiv dhe të respektueshëm midis mazhorancës dhe opozitës që lejon vendin të përballet me sukses me sfidat që e presin. Italia do të vazhdojë të mbështesë me vendosmëri institucionet shqiptare në këtë rrugë dhe aspiratat legjitime të popullit shqiptar për të qenë pjesë e familjes evropiane.
