TIRANË
Ambasada amerikane në Shqipëri me anë të një lajmërimi, shprehet se ka nisur një plan veprimi, që synon të rrisë rolin e gruas në shoqëri.
Sipas ambasadës, ky plan synon që femra të mund të ketë qasje institucionale, për të ndërtuar kapital, për të zotëruar dhe menaxhuar pronat, për të udhëtuar lirisht e për të bërë punë në të njëjtat fusha si burrat.
Në njoftim saktësohet se ky plan veprimi do të bënte që të kemi një shoqëri më paqësore dhe më të zhvilluar.
Postimi i ambasadës amerikane në Tiranë:
Që shoqëritë të jenë më paqësore dhe të zhvilluara, gratë duhet të kenë mundësinë të marrin pjesë tërësisht në komunitetet e tyre. Departamenti i Shtetit njoftoi nisjen e Planit të Veprimit të Shtyllës së Tretë, i cili përfshin veprime konkrete në përgjigje të kufizimeve në pesë faktorë themelorë: mundësinë e grave për të pasur qasje në institucione, për të ndërtuar kapital, për të zotëruar dhe administruar prona, për të udhëtuar lirisht dhe për të punuar në të njëjtat fusha dhe punë si burrat.
Përmes këtij plani të ri dhe dinamik, Departamenti do të zbatojë zgjidhje efikase për të hequr pengesat në politika, ligje, rregullore dhe praktika, për të ndihmuar gratë të kenë një rol kuptimplotë në ekonomi si aktorë të barabartë ekonomikë. Mësoni më shumë rreth qasjes së Departamentit ndaj Nismës Globale për Zhvillimin dhe Përparimin e Grave të udhëhequr nga Shtëpia e Bardhë në: www.wgdp.gov
