Pamja e parë që u shfaqet vizitorëve, vendas apo të huaj, që mbërrijnë në parkun arkeologjik të Amantias në Vlorë është e zymtë, hyrja e parkut është e mbuluar nga mbeturinat.
Kjo situatë jo vetëm që dëmton imazhin e një prej pasurive arkeologjike më të rëndësishme të vendit, por tregon dhe mungesën e çdo angazhimi institucional për pastrim e mirëmbajtje, ndonëse jemi në prag të sezonit turistik.
Zyrtarët lokalë duket se janë të përqendruar në axhenda elektorale, ndërsa Amantia, një destinacion me potencial të jashtëzakonshëm për turizmin kulturor, përballet me neglizhencë totale.
Askush nuk ka dhënë një sqarim se si kanë përfunduar mbeturinat në këtë zonë, apo kush është përgjegjësi, por gjendja në terren flet vetë parkut i është kthyer shpinën.
Në vend që të mirëpriten me informacion, gjelbërim apo rrugë të sistemuara, turistët përballen me një ambient të ndotur dhe të braktisur.
Një situatë që jo vetëm turpëron, por edhe dëmton përpjekjet për promovimin e trashëgimisë sonë kulturore.
