Ditën e sotme është mbledhur Komisioni Hetimor për inceneratorët dhe ka thirrur për të dëshmuar ashtu siç ishte paralajmëruar, tre administratorë të inceneratorëve të Tiranës, Fierit dhe të Elbasanit. Si fillim po dëshmon administratorja e firmës koncesionare të inceneratorit të Tiranës, Arjola Kodra.
Administratorja Arjola Kodra është pyetur nëse pranë kompanisë koncesionare, ka qenë punësuar një familjar i deputetit socialist, Alqi Bllako. Arjola Kodra konfirmoi se Edmond Bllako, babai i Alqi Bllakos ka qenë i punësuar në këtë kompani.
“Ka qenë punojës i shërbimit, nuk është më punonjës i saj. Është punësuar para periudhës së administrimit. Unë jam emëruar me 15. 03. 2019.”-u shpreh Kodra.
Nga ana tjetër ndërhyri deputeti i PS, Arben Pëllumbi, i cili duke u munduar ta marrë në mbrojtje e ta shpëtojë nga kjo “greminë” tha se “Nuk është tager i këtij komisioni, ju mund të shkruani cfarë të doni, por nuk është tager i këtij komisioni marrëdhënia private e kompanisë me të punësuarit”.
Por, deputetja Jorida Tabaku hodhi dyshime se Alqi Bllako, si një ndër personat që ka firmosur, është në konflikt interesi.
“Unë pyeta nëse familjari i një deputeti të PS, ish-sekretar i Përgjithshëm i Ministrisë së Mjedisit, ka qënë i punësuar në këtë biznes?”-tha duke ironizuar drejtpërsëdrejti Tabaku.
Kujtojmë se Bllakos detyrën si sekretar i Përgjithshëm në Ministrinë e Mjedisit, i ishte emëruar nga Lefter Koka. Aktualisht Alqi Bllako është deputet i Partisë Socialiste,ku pas padisë së bërë nga LSI në SPAK për inceneratorët ai u shpreh se pavarësisht postit, ka pasur zero rol në çdo procedurë vendimmarrëse për dhënien e koncesioneve direkt apo indirekt. Bllako shprehet se iu takon vetëm organeve të drejtësisë të përcaktojnë nëse ka ose jo përgjgegjës dhe se cilët janë, kur ndërkohë nga ana tjetër sot del haptazi lidhja e tij në kompanitë koncensionare duke u pranuar nga administratorja e këtij të Tiranës se babai i tij ka qenë i punësuar.
