Ish-kryeministri demokrat, Aleksandër Meksi kujton sot 12 dhjetorin e 28 viteve më parë si ditën e themelimit të Partisë Demokratike. Me një shkrim në rrjetin social Facebook duke uruar të gjithë miqtë dhe në veçanti studentët, ai shprehet se 28 vite më parë, më 12 dhjetor të 1990, një grup studentësh, pedagogësh dhe intelektualësh me protestat e tyre studentore, themeluan partinë demokratike.
Ata vazhduan 4 ditë protestën të mbështetur nga dhjetëra dhe mijëra qytetarë të Tiranës.
Meksi e cilëson Partinë Demokratike si një parti që aspiron një Shqipëri me liri ekonomike, një shtet i së drejtës dhe një Shqipëri si gjithë Evropa.
Postimi i Meksit
“Si sot 28 vite më parë më 12 dhjetor 1990, e mërkurë dhe ajo, një grup studentësh, pedagogë dhe intelektualë në vijim të protestave studentore që filluan më 8 dhjetor e që vazhduan për 4 ditë e të mbështetura dhe nga dhjetëra mijëra qytetarë të Tiranës e të tjerë, themeluan Partinë Demokratike. Një Parti e të gjithëve, studentë, intelektualë e punonjës, e atyre që aspironin një Shqipëri të çliruar nga diktatura komuniste, një shtet të së drejtës e me Liri ekonomike, nje SHQIPËRI SI GJITHË EVROPA.
Nuk besoj se kujtimet e atyre ditëve shlyhen nga kujtesa e pjesëmarësve në protesta e mitingje. Unë jam i bindur se një ditë ëndërrat dhe shpresat e tyre do të realizohen.
I Uroj gjithë miqve e dashamirëve e veçanërisht studentëve të djeshëm e të tanishëm Gëzuar 12 DHJETORIN e PD.”
