Ditën e sotme 5 partitë aleate të Bashës kanë qenë në një takim me Presidentin Meta.
Nga çfarë bëhet e ditur, takimi ka zgjatur 60 minuta dhe është folur mbi mënyrat sesi vendi mund të dalë nga kriza dhe palët politike të ulen për dialog.
Për më tepër në njoftimin zyrtar që Presidenca ka bërë ka theksuar domosdoshëmrinë e vendosjes së dialogut për të shmangur konfliktet dhe për të kaluar situatën e keqe politike në të cilën vendi ndodhet.
“Do kërkoj reflektimin e të gjithëve. Reflektim me qëllim bashkëjetesën demokratike.Shqetësim për krizën serioze kushtetuese. Kisha paralajmëruar nevojën e vendosjes së dialogut. Kam bërë përpjekje për zbatimin e reformës në drejtësi.”, është shprehur Meta gjatë takimi.
Ashtu si edhe aleatët e Bashës edhe Meta ndan të njëjtin mendim se nuk është asnjëherë vonë për të reflektuar dhe sipas tij mos regjistrimi në zgjedhje rrezikon deri në pluralizmin politik të vendit.
Njoftimi i presidencës:
Presidenti i Republikës, Sh.T.Z. Ilir Meta priti sot me kërkesë të tyre kryetarët e partive politike të Grupimit të Qendrës së Djathtë, kryetarin e Partisë Republikane, z.Fatmir Mediu, kryetarin e Partisë Agrare Ambientaliste, z.Agron Duka, kryetarin e Partisë Bashkimi për të Drejtat e Njeriut, z.Vangjel Dule, kryetarin e Partisë Demokristiane, z.Nard Ndoka dhe dëgjoi me vëmendje çështjet e ngritura gjatë takimit.
Presidenti Meta shprehu shqetësimin e thellë për krizën serioze kushtetuese, institucionale dhe të përfaqësimit ku ka hyrë vendi.
Kreu i Shtetit theksoi se më herët kishte paralajmëruar domosdoshmërinë e vendosjes urgjente të dialogut për shmangien e përshkallëzimit të konfliktit.
Presidenti Meta nënvizoi se ka bërë çdo përpjekje për të nxitur zbatimin e reformës në drejtësi brenda afateve dhe parimeve kushtetuese që do të garantonin kontrollin e balancën e sistemit në një shtet funksional të së drejtës.
Nëse kjo do të kishte ndodhur, kriza aktuale politike nuk do të kishte marrë këto përmasa.
Kreu i Shtetit shprehu shqetësimin se mosregjistrimi i të gjitha partive opozitare të legjislaturës së fundit parlamentare rrezikon jo vetëm standardet e zgjedhjeve, por edhe pluralizmin politik në vend.
Presidenti Meta thekson se nuk është asnjëherë vonë për të reflektuar dhe për të gjetur zgjidhje që do të rivendosnin normalitetin kushtetues, institucional dhe demokratik të vendit. Presidenti Meta nxit dialogun dhe zërat e arsyeshëm, për dekurajimin e përshkallëzimit të mëtejshëm të krizës.
Kreu i Shtetit do të vazhdojë kontributin e Tij, me të gjitha format e mundësitë për të kërkuar reflektimin e të gjithëve, me qëllim garantimin, jo vetëm të bashkëjetesës demokratike, por edhe ecurinë e suksesshme dhe të besueshme të reformave të lidhura me integrimin europian.
