Kryeministri i Koosovës, Albin Kurti ka marrë ditën e sotme dozën e dytë të vaksinës anti-Covid, AstraZeneca. Lajmin e ka bërë të dituar me anë të një njoftimi, Ministria e Shëndetësisë së Kosovës, ku shkruan se gjithashtu janë vaksinuar edhe qytetarët që kanë marrë dozën e parë të vaksinës në Kukës. Vaksinimi ka vijuar në sallën “1 Tetori” në Prishtinë dhe në të gjithë vendin.
“Ka vazhduar edhe sot procesi i vaksinimit kundër COVID-19, në përputhje me të gjithë parametrat e cilësisë dhe sigurisë nga ekipet e trajnuara në të gjithë vendin.
Tashmë është kryer vaksinimi me dozën e dytë të vaksinës Astra-Zeneca për qytetarët të cilët e kanë marrë dozën e parë të vaksinës në Kukës. Ndërsa sot ishte dita e parë e vaksinimit me dozën e dytë për qytetarët që janë vaksinuar në Kosovë.
Në sallën e sporteve “1 Tetori”, në Prishtinë, dozën e dytë të vaksinës Astra-Zeneca e mori edhe Kryeministri i Republikës së Kosovës, Albin Kurti.
Mirënjohje për profesionistët mjekësor dhe stafin mbështetës për përpjekjet e vazhdueshme për t’u marrë me secilin aspekt kompleks të vaksinimit COVID-19”, thuhet në njoftimin e ministrisë.
Kujtojmë se Kosova ka siguruar 1 milionë doza të vaksinave anti-Covid falë kontratës me Pfizer. Ato do të jenë në vend Brenda këtij viti.
