Mesa duket shtetasit kinezë nuk gjejnë “paqe” as si turista.
Efektivët në pikën e kalimit kufitar të Hanit të Hotit kanë bllokuar për disa orë mikrobusin ku udhëtonin turistët kinezë.
Grupi i mjekëve ushtroi kontroll të imtësishëm ndaj turistëve dhe konfirmoi se asnjë prej tyre nuk kishte shenja të coronavirusit.
“Kemi disa orë këtu. Ne kemi ardhur nga Kina dhe është hera jonë e parë që vijmë në Shqipëri dhe po shkojmë ta eksplorojmë Shqipërinë. Kam shëtitur 9 shtete në botë deri më tani. Kam ardhur këtu me familjen time dhe shoqërinë time nga Kina. Çdo gjë do bëhet më mirë nesër dhe çdo gjë do kalojë dhe ne do e gjejmë një mënyrë që ta vrasim virusin”.- tha një prej turistëve kinez.
“Në pikat kufitare të Hanit të Hotit, Muriqanit dhe Bashkimit në Gërçar të Vermoshit janë marrë masa shtese dhe ushtrohen kontrolle për udhëtarët që mund të shfaqin shenja dyshuese të coronavirusit”- tha mjeku Ardian Këlliçi për Balkanweb.
