Ditën e sotme kryeprokurori i Përgjithshëm Olsian Çela në raportimin para Komisionit të Ligjeve, u shpreh se ka shtim të rasteve të kultivimit të hashashit, në katër rrethe të vendit, Vlorë, Krujë, Gjirokastër e Shkodër.
Mirëpo, ministiri i Brendshëm, Sandër Lleshaj, teksa ka komentuar raportin e kryeprokurorit Olsian Çela në një intervistë për “Hard Talk” u shpreh se kultivimi është rulur dhe Policia ka zbuluar parcela.
Më tej, ministri u shpreh se mbjellja e drogës bëhet dhe në Londër, e shtoi se Policia çdo ditë mundohet të zerojë kultivimin.
“Nuk kam dijeni, sigurisht që ka rëndom, ka raste që Policia kap sasira të vogla, ka gjithmonë në ulje. Ky vit ka shënuar ulje akoma të rëndësishme. Duhet të keni parasysh që kanabis në sasi të vogla kultivohet edhe në Londër. Nuk është fjala që këtu e kemi zeruar ne çdo tentativë kultivimi por e kemi ulur. Raste sporadike ka, sigurisht që ka dhe përpjekja e Policisë së Shtetit për ta kontrolluar territorin në mënyrë rigoroze dhe për të goditur çdo rast vazhdon edhe sot. Tentativat tani janë të izoluara, në sipërfaqe shumë të vogla dhe në territore shumë të largëta. Kjo tregon se mbijetesa e këtij fenomeni në Shqipëri tashmë është e pamundur”, u shpreh ministri i Brendshëm Sandër Lleshaj.
Pas kanabisit, informaliteti është muri i dytë që është ngritur në punën e përditshme të prokurorisë dhe kjo pengesë vështirëson hetimin e pastrimit të parave sipas kryeprokurorit.
