Siguria në plazhet e Shqipërisë vazhdon të jetë shqetësuese, ndërsa numri i mbytjeve gjatë sezonit veror 2025 vijon të jetë i lartë.
Edhe pse qeveria krenohet me rritjen e turistëve, institucionet përgjegjëse nuk kanë marrë masat e nevojshme në kohë për garantimin e sigurisë në bregdet.
Sipas rregullores, masa parandaluese dhe shërbime si patrullimi me motorë uji, pranisë së rojeve të plazhit dhe stacioneve mjekësore duhej të ishin vënë në funksion që në janar, por kjo mbeti vetëm në letër.
Vonesa dhe mungesa e koordinimit mes institucioneve lokale, Ministrisë së Turizmit dhe Policisë së Shtetit ka sjellë situata ku plazhet mbeten pa vrojtues të certifikuar dhe ndihma e parë mbërrin me vonesë.
Problemi i mungesës së rojeve në plazhe është alarmant, rreth 60% e zonave bregdetare janë pa këtë shërbim jetik. Shpesh herë rojet janë të papërgatitur, dhe në vend të tyre, detyrën e vrojtimit e kryejnë persona të pakualifikuar, si kamarierë, pa trajnim apo certifikim të duhur. Mungesa e kontrolleve serioze dhe korrupsioni ka lejuar që motorët e ujit të përdoren edhe pa dokumentacionin e nevojshëm, duke shtuar rrezikun për pushuesit.
Në sezonin veror 2025, numri i vdekjeve në plazhe mbetet shqetësues:
• Një turist 66-vjeçar nga Maqedonia humbi jetën në Shkëmbin e Kavajës si pasojë e një arresti kardiak sapo hyri në det.
• Një 81-vjeçar vdiq në plazhin e Velipojës gjithashtu nga arrest kardiak.
• Një pushues rreth 60 vjeç humbi jetën pas një mbytjeje në zonën e Taleve, pranë Hidrovorit.
• Në Vlorë, një nënë dhe vajza e saj, të huaja, u rrezikuan nga mbytja; nëna ndërroi jetë në spital.
• Një turiste 66-vjeçare nga Bosnja humbi jetën në Durrës, dyshohet për mbytje aksidentale në det.
• Një 22-vjeçar u mbyt në lumin Mat pasi e rrëmbeu rrjedha e fortë e ujit.
• Trupi i një të moshuari u gjet i pajetë në liqenin e Pogradecit.
• Një pushues 48-vjeçar humbi jetën në plazhin e Darëzezës, dyshohet për arrest kardiak.
• Një pushues rreth 50 vjeç humbi jetën në plazhin e Sektorit Rinia në Durrës.
• Një i moshuar humbi jetën në plazhin e Zvërnecit.
• Një shtetas 59-vjeçar nga Tirana vdiq në plazhin e Qerretit nga arrest kardiak sapo hyri në det.
• Kapiteni 51-vjeçar Arben Anamali u mbyt në liqenin e Shkodrës duke shpëtuar dy turistë izraelitë.
• Më 18 korrik, dy vëllezër të mitur, 7 dhe 9 vjeç, humbën jetën në lumin Shkumbin.
Këto tragjedi nënvizojnë mungesën e menaxhimit efektiv të sigurisë në plazhe si dhe nevojën urgjente për masat parandaluese dhe shërbime emergjente funksionale që nga fillimi i sezonit turistik.
Pa një përgatitje të mirëfilltë, trajnim dhe inspektim rigoroz të stafit përgjegjës, përpjekjet për të parandaluar humbjet e jetëve do të mbeten të pamjaftueshme, ndërsa numri i viktimave do të vazhdojë të rritet.
