Një rast i dyshuar dizenterie është regjistruar në kopshtin nr. 1 në Laç, pas shfaqjes së temperaturës së lartë tek një fëmijë.
Fëmija, pasi ka patur disa ditë temperaturë, është dërguar në spitalin e QSUT-së, ku analizat e kryera konfirmuan diagnozën e dizenterisë.
Dizenteria është një sëmundje ngjitëse e shoqëruar me diarre të rënda. Është një inflamacion i zorrëve, kryesisht i zorrës së trashë.
Ajo mund të shkaktojë dhimbje stomaku të lehta ose të rënda dhe diarre të rëndë me mukus ose gjak në feçe.
Pa trajtimin adekuat, ajo mund të jetë fatale. Bakteri Bacillus Shigella është shkaku më i zakonshëm i kësaj sëmundje
Ky rast ka shkaktuar shqetësim te drejtuesit e kopshtit, të cilët informuan menjëherë institucionet përkatëse të Bashkisë Kurbin dhe Shëndetit Publik për mundësinë e një shpërthimi të mundshëm të sëmundjes.
Si pasojë, Bashkia ka ngritur një grup pune për të filluar dezinfektimin e ambienteve të kopshtit. Përveç kësaj, Instituti i Shëndetit Publik ka marrë mostra për analiza, ndërkohë që kopshti do të rihapet vetëm pas marrjes së rezultateve të analizave.
