Shqiptari Alfred Kipe që akuzohet për vrasjen e Luljeta Heshtës do të mbetet në burg. Ky është vendimi që ka marrë Gjykata e Milanos.
42-vjeçari ka folur për disa minuta në lidhje online nga burgu i San Vittores ku po mbahet momentalisht, ndërkohë në sallën e gjyqit kanë qenë avokati mbrojtës Lino Terranova, gjyqtari dhe prokurorja e Lodit, Antonella Dipinto.
Kipe akuzohet për vrasjen e 47-vjeçares Luljeta Heshta me të cilën bashkëjetonte prej mëse 20 vitesh. Shqiptari ka qenë ish-polic, dhe ndërkohë ka prova që ai është fajtor. Një video e bërë nga një dëshmitar i rastit tregon Kipen duke u larguar nga vendi i ngjarjes i veshur me rroba të zeza, me një kapuç dhe atlete të kuqe. Gjithsesi për avokatin mbrojtës kjo nuk është provë e mjaftueshme pasi video duhet verifikuar.
Luljeta Heshta u vra ditë më parë në një rrugë të Milanos që është e njohur për prostitucion. Ajo u godit në këmbë dhe në shpatull dhe nuk arriti t’i mbijetonte plagëve të marra edhe pse u dërgua në spital.
Kipe pranoi se kishte pasur probleme me Heshtën, por nuk pranoi ta kishte vrarë kur u mor për herë të parë në pyetje. Dyshohet se konfliktet kanë qenë për arsye xhelozie, e njëjta arsye për të cilën dyshohet të ketë ndodhur edhe ngjarja.
