Briken Rusta dhe Gerti Hysenbelliu, të arrestuar si autorë të djegies së qëllimshme të dy makinave të punonjësve të policisë në Elbasan kanë lënë qelinë ditën e sotme.
Ata u arrestuan nga Policia e Elbasanit, si autorët kryesorë për djegien e qëllimshme të automjetit të oficerit të policisë Edvin Gjyli, ngjarje kjo e ndodhur më 8 janar të këtij viti.
Po ashtu, dy të rinjtë dyshohet se janë autorë edhe të djegjes së automjeti të ish-oficerit të antidrogës në Elbasan Krenar Kaso, ngjarje e ndodhur më 25 dhjetor 2019.
Vendimi për lirimin e Briken Rustës dhe Gerti Hysenbelliut është marrë nga gjyqtarja Pajtime Fetahu dhe lirimi i tyre është bërë sepse në dosje nuk ishte administruar analiza e pamjeve filmike, ku dyshohet se shfaqen dy autorët e këtyre dy ngjarjeve kriminale.
Muajin që lamë pas, Fetahu, kishte caktuar masën e “arrestit në burg” me një afat 20-ditur, për analizimin e pamjeve filmike.
Mirëpo, ky raport analizimi nuk ka mbërritur në kohë në adresë të Prokurorisë dhe nga ana tjetër ka përfunduar afati 20-ditor i qëndrimit në burg të dy të dyshuarve Rusta dhe Hysenbelliu.
Dy të rinjtë dyshohet se janë paguar dhe shtyrë nga të tjerë për të kryer krimin, teksa njëri prej tyre, Gerti Hysenbelliu, është me precedent penalë, sepse disa vite më parë është dënuar në mungesë me 3.6 vite burgim për akuzën e “Plagosjes së rëndë me dashje” të E.S., në qytetin e Elbasanit.
