Ish-kryeministri Sali Berisha ka hedhur akuza ndaj kreut të SPAK-ut, Altin Dumani, lidhur me pronësinë e tre apartamenteve të këtij të fundit.
Në një dalje televizive mbrëmjen e sotme, Dumani iu përgjigj këtyre akuzave, duke konfirmuar se posedon tre apartamente.
Ai deklaroi se apartamentet janë të deklaruara në ILDKPI, ndërsa theksoi se nuk ka pranuar asnjëherë ryshfet apo dhurata.
Nuk kam pse i jap përgjigje Berishës, por i jap përgjigje publikut se paguhem nga taksat e shqiptarëve. Pasuria ime është kontrolluar në detaje përmes një procesi administrativ shumë të thellë. Kush është i interesuar mund të shkojë dhe t’i marrë dokumentet atje nga ‘vetting’-u. Unë nuk kam asgjë për të fshehur dhe çdo gjë e kam të deklaruar dhe çdo gjë është produkt i punës time dhe të familjes time si dhe të një kredie që unë e kam marrë para vitit 2006.
Pasuritë i kam, edhe këto tre apartamente që përmend Berisha. Dy janë para vitit 2013, një është pas. Mua më njohin shumë mirë. Kurrë, kurrë në jetën time nuk kam pranuar jo përfitim të parregullt, jo ryshfet por qoftë dhe një dhuratë që tejkalon shumën prej 100 dollarë që është detyrim ligjor. E kam bërë pakt me veten e familjen time. Unë e dua punën time. E bëj me mish e shpirt”, theksoi Dumani.
