Departamenti i Shtetit hodhi sot poshtë akuzat e bëra në Shqipëri nga ish kryeministri Sali Berisha ndaj ambasadores Yuri Kim.
Në përgjigje të pyetjes së Zërit të Amerikës lidhur me akuzat e bëra nga ish kryeminstri Sali Berisha ndaj Ambasadores Yuri Kim se ajo po sillet si guvernatore në Shqipëri dhe se mbështet kryeministrin Edi Rama, zëdhënësi i Departamentit të Shtetit Ned Price tha se “Uashingtoni është i shqetësuar nga sulmet e pajustifikuara ndaj ambasadores tonë në Tiranë. Këto sulme të shëmtuara nuk përfaqësojnë popullin shqiptar. Siç e ka udhëzuar Uashingtoni, thekson zëdhënësi Price, ambasadorja Kim ka shpjeguar dhe zbatuar qartë politikat e Shteteve të Bashkuara, përfshirë vendosmërinë e Presidentit Biden për të mbajtur përgjegjës ata persona që përfshihen në korrupsion, ose minojnë demokracinë.
Shtetet e Bashkuara, thekson më tej zëdhënësi, vlerësojnë marrëdhëniet me popullin shqiptar dhe vitin e ardhshëm do të kremtojmë 100 vjetorin e vendosjes së marrëdhënieve mes dy vendeve. Marrëdhëniet tona, përfundon zëdhënësi, i mbijetuan komunizmit dhe diktaturës për shkak të angazhimit të përbashkët për demokraci dhe respektit të ndërsjellë.
Ambasadorja e SHBA, Yuri Kim u është pëgjigjur akuzave të shqiptuara nga Sali Berisha gjatë punimeve të Kuvendit Kombëtar të PD-së të thirrur prej tij, më një fjalim të Ambasadorit të parë amerikan në Shqipëri, William Ryerson.
Kim përcjell rrëfimin e Ryerson, që tregon një prej momenteve të vizitës së Sekretarit të Shtetit, James Baker në Tiranë. Në rrëfimin e tij, Ambasadori Ryerson kujton momentin kur një efektiv shqiptar i sigurisë u përlot.
“Isha pranë një autokolonës së makinave dhe afër një polic të gjatë, të fortë e të ashpër. Kur Baker tha ‘ne jemi me ju dhe ju jeni me ne, pashë pika loti në sytë e atij polici”, thotë Ryerson.
Kjo është pjesa që ndalet më shumë edhe Yuri Kim, duke kërkuar që të mos harrohet.
“Teksa po shkojmë drejt fundit të 2021, që shenjon 30-vjetorin e rivendosjes së marrëdhënieve mes SHBA dhe Shqipëria, doja të shpërndaja këtë mesazh të Ambasadorit Ryerson. Ky moment i fortë i 30 viteve më parë, është po aq aktual dhe i vërtetë edhe sot pas 30 vitesh. Le të mos e harrojmë! SHBA dhe Shqipëria le të jenë gjithmonë pranë njëra-tjetrës”, shkruan Kim.
Mesazhi i Ambasadores së SHBA mbërrin një ditë pasi Sali Berisha e akuzoi se po sillej si Guvernatore në Shqipëri, madje e krahasoi edhe me sjelljen e ish-ambasadorëve të Bashkimit Sovjetik gjatë periudhës së komunizmit./VOA
