Një tjetër akuzë ka dalë ditën e sotme nga zyrat e Partisë Demokratike në adresë të kryetarit të Bashkisë së Tiranës, Erion Veliaj.
Zëdhënësja e Partisë Demokratike, Ina Zhupa, përmes disa dokumentave të reja, ka akuziar Veliajn se ia ka dhënë parkingjet publike të Tiranës një kompanie offshore.
Në një postim në rrjetet sociale, Zhupa bën të ditur se kompania “Pay and Go shpk”, është paracaktuar muaj më parë si kompania që do të realizojë këtë shërbim.
Megjithatë, Tirana Parking nuk ka bërë asnjë njoftim për hapjen e konkursit për përzgjedhjen e fituesit për menaxhimin e hapsirave të parkimit.
Zhupa shprehet se kompania me seli në Angli dhe Uells, në pronësi të një shtetasi gjeorgjian, rezulton një kompani offshore e regjistruar në një parajsë fiskale.
Statusi i plotë i Zhupës
Veliaj nuk i ndahet offshoreve!!! Ja kush është i paracaktuari i Veliajt për ti dhënë parkingjet publike të Tiranës!
Bashkia Tiranë nëpërmjet shoqërisë “Tirana Parking” administron shërbimin e Parkimit Publik me Pagesë në disa rrugë dhe hapësira publike të Tiranës. Aktualisht pagesat per parkingun ne rruget e Tiranës kryhen me ane te sistemit me sms dhe me punonjës të bashkisë. Në mbledhjen e fundit të këshillit bashkiak u vendos dhënia tek një privat për të rritur format e pagesës dhe sigurisht edhe pagesën.
Sipas vendimit, Tirana Parking duhet të hap procedurën konkuruese për përzgjedhjen e fituesit. Ndërkohë fituesi mesa duket është paracaktuar nga Veliaj muaj më parë.
Mesa duket fituesi do jetë kompania: Pay and Go shpk, regjistruar në shkurt 2015, si shoqëri e krijuar nga shoqëria “UNTAG COMMUNITY”, me seli në Angli dhe Uells në pronësi të një gjeorgjiani, e cila rezulton të jetë një kompani OFFSHORE e rregjistruar në parajsa fiskale.
Bashkia ka nisur të vendos tabela informuese pranë automateve të pagesave “Pay and Go Albania” që janë te vendosur ne rruget e Tiranes ku ne tabela shkruhet “ Mund te paguash edhe ketu” (bashkengjitur Foto) Nga verifikimi ne disa rruge kryesore te Tiranes ku ofrohet pakingu me pagesë konstatohet qe kompania ka pergatitur infrastrukturen e nevojshme per te ofruar kete sherbim edhe pse nuk ka akoma asnje vendimarrje nga Bashkia Tirane për hapjen e konkurrimit për kompaninë që duhet ta fitonte këtë shërbim.
Paracaktim fituesi dhe kompani offshore binomi i pandarë i menaxhimit nga Erioni Betoni të qytetit të Tiranës.
