“Po më bëjnë sulm politik”, deklaron në reagimin e tij Lulzim Berisha, pasi SPAK lëshoi urdhër-arrestin për të, si i përfshirë në vrasjen e Klodian Saliut.
Në një mesazh për mediat, Lul Berisha shprehet se është i hapur për drejtësinë, ndërsa shton se sulmi ndaj tij është për qëllime politike. Ai ka deklaruar se në momentin e vrasjes së Klodian Saliut ka qenë për kurim në Turqi dhe këtë fakt ia ka bërë të ditur Krimeve të Rënda.
Vrasjen e Vajdin Lamajt ai e ka mohuar kategorikisht, ndërsa kërkon nga SPAK që t’i vërë përpara prova, pasi po fut në hasmëri persona të ndryshëm.
Vrasja e Lamajt ndodhi në 27 shkurt 2005, ku mbeti i vrarë me lëndë plasëse në pallatin ku banonte biznesmeni Vajdin Lamaj dhe Artan Arsi, ku autorët e dyshuar janë Emiljano Shullazi dhe Viktor Ymeraj
Sapo Lamaj dhe Arsi janë ngjitur në ashensor, ndërmjet katit të pestë dhe katit të gjashtë ka ndodhur shpërthimi i lëndës eksplozive, duke i lënë të dy personat të vdekur në vend. Sasia e eksplozivit ka qenë e madhe dhe bëhej fjalë për një eksploziv të cilësisë së lartë. Dy viktimat do të ngjiteshin në katin e tetë, ku kishte shtëpinë Lame. Ashensori në momentin e shpërthimit ka qenë në ngjitje dhe mendohet që shpërthimi të jetë realizuar me telekomandim nga distanca. Gjatë shpërthimit është shkatërruar totalisht ashensori, por nuk është dëmtuar asnjë nga katet e pallatit.
Lamaj ishte një biznesmen i njohur në kryeqytet asokohe, kur mbante edhe postin e Presidentit të Federatës Shqiptare të Boksit, si dhe zv.President i Top Albania Radios, një media e themeluar nga i ndjeri Dritan Hoxha.
Prej 15 viteve nuk kishte asnjë të arrestuar për këto dy vrasje të bujshme, por SPAK është ndihmuar nga dëshmia e të penduarit Luftar Reçi, i cili ka rrëfyer gjithçka, duke bërë që SPAK të lëshojë urdhër-arrestet për personat e dyshuar.
Emiliano Shullazi dhe Viktor Ymeraj janë të arrestuar, ashtu si edhe Indrit Taullai, ndërkohë që janë shpallur në kërkim ndërkombëtar Lulzim Berisha dhe Plarent Dervishi.
