Aktori i njohur shqiptar, Guljem Radoja është në gjendje të rëndë shëndetësore për shkak të infektimit me Covid-19. Lajmin e ka bërë të ditur skenografi Bashkim Zahaj me anë të një postimi në Facebook ku shkruan se Radoja është rëndë i shtruar në spitalin e Durrësit. Skenaristi i bën thirrje qeverisë që ta dërgojë aktorin e njohur për kurim jashtë shtetit.
“Mesoj se Guljemi aktori jone i dashur qenka rende ne spitalin e Durresit nga covid. Shteti shqiptar i detyrohet ketij aktori per nje sherbim me te specializuar jashte shtetit. Uroj te rezistosh e te fitosh Guljem,”-shkruan ai.
Guljem Radoja është një nga aktorët shumë të dashur të kinematografisë shqiptare, teksa ka luajtur në role shumë të njohura. Ai ka luajtur në më shumë se 30 role, por ka spikatur duke mbetur i paharruar në rolin e Petro Nini Luarasit në filmin “Kush vdes në këmbë”. Për meritat e tij të veçanta ai është nderuar me titullin “Artist i Merituar”.
Me sa duket nuk ka pasur vaksina të mjaftueshme për të gjithë personalitetet. Është e trishtë që vazhdojmë të humbasim figura të dashura të artit duke i lënë madje në harresë e nëpër spitale pa kushte. Ndërkohë që zhpenzon miliona euro për fushatë, qeveria nuk ka lekë për të dërguar për kurim jashtë vendit një artist të merituar. E me shumë mundësi as nuk e ka ditur më parë që Radoja është i sëmurë.
