Një vatër zjarri është shfaqur pasditen e sotme në Memaliaj. Mësohet se flakët kanë përfshirë një sipërfaqe pyjesh në fshatin Memalia dhe raportohet se nga zjarri janë dëgjuar edhe shpërthime të municioneve luftarake.
Zjarrfikësit janë nisur me urgjencë drejt vendit të ngjarjes, por terreni e bën mjaft të vështirë ndërhyrjen. Aktualisht po punohet për të mbajtur flakët larg banesave. Deri tani nuk raportohet që të ketë dëme në njerëz apo pasoja të tjera fatale.
Ditën e sotme një tjetër shpërthim u raportua në Dropull të Gjirokastrës. 10 mina të Luftës së Dytë Botërore dyshohet se shpërthyen në fshatin Radat, si pasojë e nxehtësisë së zjarrit që përfshiu bimësinë në këtë zonë gjatë paradites.
Ministria e Mbrojtjes tha se diçka e tillë nuk është ende e konfirmuar dhe se nuk dihet nëse ato që kanë shpërthyer kanë qenë apo jo mina apo bombola gazi në një grumbull mbeturinash.
“Përsa i përket shpërthimeve ende nuk janë konfirmuar nëse mund të kenë qenë granata të Luftës së Dytë Botërore apo bombola gazi në një grumbull mbeturinash. Nuk ka rrezik për banesa. Ka një vatër zjarri në mes të shpatit të malit, ku po ndërhyjnë forcat e ushtrisë dhe zjarrfikëset”, thuhej në njoftimin e ministrisë.
