Pas denoncimit të aktivistes së Partisë Demokratike, Elsa Bita nga Divjaka, e cila tha se është dhunuar nga shefi i komisariatit Altin Shehu, një reagim ka ardhur edhe nga Presidenti i Republikës, Ilir Meta. Presidenti ka shpërndarë në rrjetin social “Facebook” videon ku e dhunuara gjendet në ambientet e spitalit, ndërsa tregon se kjo ngjarje ka ndodhur pasi po filmonte një takim elektoral të Partisë Socialiste që po zhvillohej në Divjakë. Ndërsa i bën thirrje SPAK që të nisë menjëherë hetimet, Meta dënon aktet e dhunës, ndërsa thekson se autorët duhet të arrestohen urgjentisht nga Policia e Shtetit. Sipas Metës, çdo mosveprim i SPAK, i ngarkon me përgjegjësi të plotë për çdo akt dhune në vijim.
Statusi i Ilir Metës:
“I bëj thirrje Prokurorisë dhe SPAK të hetojë urgjentisht dhunën kriminale të ushtruar sot ndaj zonjës, Elsa Bita në Divjakë. I bëj thirrje Policisë së Shtetit të arrestojë urgjentisht autorin apo autorët e dhunës, cilëtdo qofshin ata. Çdo mosveprim, ju ngarkon me përgjegjësi të plotë për çdo akt dhune në vijim. Nesër duhet të jetë Festa e Demokracisë të një vendi që e meriton anëtarësimin në Bashkimin Europian”.
Por çfarë ndodhi ditën e sotme në Divjakë?
Elsa Bita, aktiviste dhe mbështetëse e Partisë Demokratike në Divjakë, raportohet se është rrahur për shkak të denoncimeve kundër Partisw Socialiste. Fillimisht ajo denoncoi se është dhunuar nga vëllai i kryebashkiakut të qytetit, Fredi Kokoneshi, ndërsa në një version të dytë, ajo tha se është dhunuar nga shefi i Policisë në Divjakë, Altin Shehu. Sipas denoncimit, shefi i policisë i ka thyer krahun të resë, e cila ndodhet në spital. Ajo thotë se u dhunua pasi filmoi edhe administratën duke marrë pjesë në disa takime elektorale.
