Policia e Tiranës ka zhvilluar hetime prej disa javësh, gjë që çoi në aksionin e ditës së sotme ku në prangat e policisë përfundoi një efektiv i forcave RENEA. Efektivi i arrestuar është Xhulio Liçi, i cili kishte rolin e transportuesit.
Efektivi i RENEAS është vënë në prangat e Policisë së Shtetit pasi është kapur me 1 kilogram kokainë. Po ashtu janë arrestuar dhe dy bashkëpunëtorët e tij, identiteti i të cilëve nuk bëhet i ditur. Megjithatë bëhet me dije se nuk janë pjesë e “bluve” të vendit.
Burime nga grupi hetimor kanë bërë me dije se efektivi i forcave RENEA, ndihmonte dy trafikantët por edhe transportonte kokainë duke abuzuar kështu me detyrën. Bazuar në informacionet e mbledhura për Liçin, Shërbimi i Çështjeve të Brendshme të Ankesave kishte lëshuar sinjal për prangosjen e efektivit, duke vënë kolegët që ta mbikëqyrnin. Ai është arrestuar në flagrancë së bashku me 2 trafikantët e drogës, në momentin që po transportonin 1 kg kokainë. Ndërkohë që ende nuk dihet nëse droga do të shkonte për shitje apo sa ishte marrë nga vendi ku furnizoheshin.
Aktualisht Policia ka sekuestruar telefonat e tyre të arrestuarve dhe ka nisur nga puna për kontrollin e të gjitha kontakteve në mënyrë që të zbardhin të plotë listën e klientëve por ende personat e tjerë të përfshirë në trafikun e kokainës. Përveç kësaj kontrolle po zhvillohen edhe në banesat e të arrestuarve. Ndërkohë deri më tani nuk ka asnjë njoftim zyrtar nga Policia e Shtetit lidhur me arrestimet në kryeqytet.
