Policia e Shtetit në bashkëpunim me IKMT-në, inspetorët e bashkive dhe shërbimit të zonavetë mbrojtura po kryen një aksion në zonën e Krastë-Vrionit për shembjen e 11 furrave të gëlqeres. Pavarësisht se në të kaluarën këto furra u shembën, personat që kontrollojnë këtë aktivitet i kanë ndërtuar sërish në mënyrë të paligjshme. Një pjesë prej tyre janë arrestuar ose proceduar.
Furrat e gëlqeres janë një problem serioz për banorët e zonës Krastë-Vrionit për shkak të efekteve të dëmshme në mjedis dhe sëmundjeve të ndryshme të shkaktuara. Në këto furra digjen gjithashtu dhe goma makinash, pjesë makinash, mbetje të fasonerive të rrethit Krujë e mbetje të fabrikave e punishteve të ndryshme.
Furrat ishin ndërtuar në brendësi të pyjeve në zonën e mbrojtur të Krastës. Furrat operonin në mënyrë të paligjshme, ndonëse disa vite më parë aktiviteti i tyre ishte ndaluar nga strukturat shtetërore. Këto furra ishin nga ndotësit më të mëdhenj në rrethin e Krujës. Nuk ka asnjë të ndaluar për shkelje të mundshme ligjore nga pronarët e këtyre furrave.
Bizneset e gëlqeres në zonën e Krujës sfidojnë shtetin. Megjithëse janë zhvilluar dhjetëra aksione për mbylljen e furrave, ato vazhdojnë aktivitetin në mënyrë ilegale.
Gazetarët e emisionit investigativ “Fiks Fare” vëzhguan për disa muaj situatën në Krujë, ku folën me pronarë dhe punëtorë në këto biznese, të cilët thanë se kanë paguar ryshfet që të vijojnë punën.
Madje, një pronar tha se paguan 500 mijë lekë ryshfet çdo muaj në mënyrë që të vijojë të prodhojë gëlqere i qetë. Ndërkohë, mitëmarrësit janë inspektorë të Mjedisit dhe Pyjeve, si dhe punonjës policie.
