Ditën e sotme Gjykata e Tiranës vendosi që të zbusë masën e sigurisë ndaj Ajas Sulejmanit, i cili aksidentoi çiftin dhe foshnjën 3-muajshe teksa po kalonin në vijat e bardha. 39-vjeçari Sulejmani , me makinën e tij luksoze shkaktoi aksidentin e rëndë në rrugën e Kavajës në Tiranë dhe më pas u largua nga vendi ngjarjes por nuk iu shpëtoi dot policisë pasi u arrestua pas disa orësh. Disa muaj më parë ai u la në arrest me burg nga Gjykata e Tiranës, pasi kjo e fundit rrëzoi pretendimet e palës mbrojtëse, e cila kërkonte lirimin e të akuzuarit me motivin se nuk i kanë punuar frenat dhe se nuk ka qenë shpejtësi e lartë, vetëm 40 km/h. Ndërkohë ditën e sotme gjykata vendosi që 39-vjeçari do të hetohet nën masën e arrestit shtëpiak.
Mësohet se togat e zeza të kryeqytetit pranuan kërkesën e Suljemanit për masë më të butë sigurie edhe për shkak të normalizimit të marrëdhënieve mes palëve
Kujtojmë se ngjarja ndodhi më 8 maj 2022.
Ajas Sulejmani nën efektin e lëndëve narkotike hyri me makinën tip ‘G Class’ me semafor të kuq dhe përplasi çiftin dhe foshnjën teksa kalonin te vijat e bardha.
Arjan dhe Vilma Konomi, çifti që u aksidentua iu desh që të qëndronin një muaj në spital, pas dëmtimeve që morën nga përplasja.
