Kryeministri i Kosovës, Albin Kurti, ka arritur në Kroaci ku është pritur nga ambasadori i Kosovës, Gëzim Kasapolli dhe disa zyrtarë. Kurti ka arritur në vendin ku një autobus me emigrantë nga Kosova u aksidentua, gjithashtu pritet që kryeministri të vizitojë të lënduarit që po trajtohen në spital. Bashkë me të janë edhe ministrja e Punëve të Jashtme, Donika Gërvalla, ministri i Punëve të Brendshme, Xhelal Sveçla, ministri i Shëndetësisë, Arben Vitia si dhe shefi kabinetit të Vjosa Osmanit, Blerim Vela.
Në Slavonski Brod një autobus me emigrantë është aksidentuar dhe për kanë humbur jetën 10 persona si dhe janë lënduar 45 pasagjerë të tjerë. Policia kroate me anë të një deklarate zyrtare ka treguar me detaje se si ndodhi aksidenti tragjikm në autostradën afër qytetit Slavonski Brod.
Policia kroate tha se në orën 6:19 të mëngjesit të sotëm pranoi raportin e aksidentit në autostradën A3 Bregana-Lipovac, në korsinë jugore, afër qytetit Slavonski Brod. Në deklaratën e Policisë është përshkruar se si autobusi me 67 pasagjerë dhe dy shoferë, doli nga autostrada. Ndërkohë, 14 persona që i mbijetuan pa lëndime aksidentit të tmerrshëm të mëngjesit të sotëm në autostradën në hyrje të Slavonski Brod të Kroacisë, aktualisht janë strehuar dhe përkujdesur në objektin Pansion Antonio në këtë qytet që ofron shërbime hotelierike.
Gjithashtu presidentja e Kosovës, Vjosa Osmani, e ka shpallur të hënën ditë zie, për shkak të këtij aksidenti i cili u mori jetën 10 personave, kryesisht emigrantë që po vinin nga Gjermania për pushime në Kosovë. Kujtojmë se nga aksidenti i rëndë mbetën të vdekur 10 persona, ndërsa 45 të tjerë janë plagosur. Autobusi me targa Kosove ishte nisur nga Frankfurti i Gjermanisë për në Kosovë, mirëpo përgjumja e drejtuesit bëri që mjeti të dilte nga rruga dhe të rrëshqiste për më shumë se 100 metra. Shoferi i autobusit është arrestuar dhe sipas dëshmisë së tij për autoritetet kroate, rezulton se në momentin tragjik e kishte zënë gjumi. Ky dyshohet dhe si shkaku i plotë i ngjarjes së rëndë, megjithatë hetimet janë ende duke vijuar.
