KAKAVIJË
Policia e Gjiorokastrës ka reaguar, duke dhënë detajet, në lidhje me ngjarjen tragjike të ndodhur sot në Kakavijë, ku ambulanca përplasi për vdekje fëmijën 10 vjec.
Në një lajmërim për mediat, policia thotë se ambulanca ka përplasur për vdekje një fëmijë 10-vjecar, ndërsa ishte duke transportuar një të sëmurë.
Më tej në këtë njoftim, thuhet se është shoqëruar në komisariat shoferi i ambulancës, ndërsa e sëmura u dërgua në spital.
“Rreth orës 10:30, në aksin nacional Kakavije – Gjirokastër, në afërsi të kthesës së Bularatit, një autoambulancë me drejtues shtetasin A. G, që po transportonte një shtetase të sëmurë për në spitalin rajonal Gjirokastër, ka përplasur këmbësorin, shtetasin S. N., 10 vjeç, banues në Lezhë, i cili ka humbur jetën.
Drejtuesi i ambulancës është shoqëruar për në ambientet e Komisariatit të Policisë Gjirokastër, ndërsa shtetasja e sëmurë është transportuar me makinë policie drejt spitalit rajonal Gjirokastër. Në vendngjarje ndodhet grupi hetimor dhe po punon për zbardhjen e plotë të ngjarjes“, njofton policia.
Aksidenti tragjik ndodhi sot, ndërsa djali ishte në radhë në pikën kufitare të Kakavijës.
Dëshmitarët shprehen se ambulanca ishte bosh kur shtypi për vdekje vogëlushin.
Në Kakavijë, vazhdon që të jetë e rëndë situata prej disa ditësh, pasi pala greke kërkon tamponë, ndërsa sot po punon me orar të kufizuar, për shkak të festës së “Shën Mërisë”.
