Mbrëmjen e sotme në sheshin ‘Skënderbej’ në Tiranë, janë ndezur qiri për viktimat të cilët humbën jetën tragjikisht, në ngjarjen e ndodhur në Bullgari ku autobuzi u përfshi në flakë.
Ky organizim kryesisht është thirrur përmes rrjeteve sociale nga aktivistë dhe figura publike.
Aksidenti tragjik ka ndodhur më 23 nëntor në një autostradë në jugperëndim të Sofjes. Fillimisht mjeti ka humbur kontrollin duke u përplasur me barrierat anësore , ndërsa humbën jetën 46 persona dhe u plagosën 7 të tjerë. Në mesin e viktimave ishin edhe 12 fëmijë.
Qytetarë, artistë, këngëtarë janë bërë bashkë për të bërë homazhe në nder të viktimave, pjesë e të cilëve ishte edhe këngëtarja Irma Libohova , si edhe pedagogu Erion Kristo.
Kujtojmë se disa orë më parë Zëdhënësja e kryeprokurokurorisë bullgare, Siika Mileva, ka folur rreth një misteri, se vetë 44 trupa arritën të identifikoheshin dhe se 1 është zhdukur.
“Kështu është matematika e thjeshtë që kemi të dhëna se në autobus ishin 52 pasagjerë. Ne gjetëm 44 kufoma, 7 persona, 4 burra dhe 3 gra u shtruan në spital. Enigma e madhe mbetet, ku është personi i tetë? Ne punojmë sipas atij versioni, nuk duam të ngatërrojmë publikun. Mund të jetë edhe një deklaratë e papërshtatshme nga një dëshmitar okular”, tha Mileva.
Ajo tregoi gjithashtu se një nga të mbijetuarit deklaroi kategorikisht se 8 persona arritën të shpëtonin.
Kryehetuesi Sarafov e interpreton këtë dukuri si mundësi që njëri nga pasagjerët e autobusit të ketë kaluar në njërin nga tre autobusët e tjerë që ishin me atë të djegur.
“Për momentin është një enigmë për ne, por do të jetë objekt hetimi”, tha Sarafov.
