Presidentja e Republikës së Kosovës, Vjosa Osmani në mbështetje të Kushtetutës së Kosovës, ka marrë vendimin që dita e hënë, 26 korrik 2021, të shpallet ditë zie, shtetërore në nderim të qytetarëve të Republikës së Kosovës, të cilët kanë humbur jetën tragjikisht në aksident rrugor në Republikën e Kroacisë. Gjithashtu si pasojë e ngjarjes tragjike, Presidentja Vjosa Osmani, ka anuluar vizitën e saj në Japoni dhe ditën e nesërme do të niset drejt Kosovës.
“Shkaku i kësaj ngjarje tragjike, Presidentja Osmani e ka ndërprerë vizitën në Japoni dhe nesër do të udhëtojë për në Kosovë”, thuhet në komunikatën drejtuar mediave.
Po ashtu sjellim në vëmendje se kryeministri i Kosovës, Albin Kurti sot është nisur drejt Kroaci, pas aksidentit tragjik që ndodhi në Kroaci, ku fatkeqësisht kanë humbur jetën 10 persona dhe janë plagosur mbi 40 të tjerë, midis të cilëve edhe fëmijë.
Gjithashtu 15 prej tyre janë në gjendje më të rëndë shëndetësore, por aktualisht janë nën kujdesin e mjekëve. Ngjarja e rëndë ka ndodhur rreth orës 6:00 të mëngjesit, sipas asaj që raportojnë mediat kroate, ndërsa autobusi ishte nisur nga Frankfurti për në Prishtinë. Brenda tij ndodheshin në total 60 persona. Lajmin e ka konfirmuar kryeministri kroat, Andrej Plenkovic. Gjithashtu numri i viktimave u konfirmua edhe nga ambasada e Kosovës në Zagreb.
