Nisur nga aksidentet me pasojë vdekje gjatë ditëve të fundit në Shqipëri, që kanë tronditur vendin, Instituti i Shëndetit Publik (ISHP), ka reaguar me një apel ndërgjegjësues për drejtuesit e autoveturave.
Nëpërmjet një statusi në rrjetin social “Facebook”, ISHP i bën thirrje shoferëve që të udhëtojnë me kujdes , me qëllim që të mos e shdërrojnë mjetin në vrasës.
“Shpejtësia e lartë dhe parakalimet e gabuara janë ndër shkaqet kryesore të aksidenteve në javët e fundit, ku fatkeqësisht janë shënuar edhe viktima”, shkruhet mes të tjerash në njoftimin e ISHP-së.
Njoftimi i plotë Instituti i Shëndetit Publik:
“Mos nxito! PËR DISA MINUTA MË PAK, JU MUND TA SHNDËRRONI MJETIN TUAJ NË VRASËS.
Shpejtësia e lartë dhe parakalimet e gabuara, shkaqet kryesore të aksidenteve në javët e fundit, ku fatkeqësisht janë shënuar edhe viktima. Akset më problematike janë: Fier –Vlorë, Rrogozhinë-Elbasan, Fushë-Krujë- Lezhë etj.
Ndër shkeljet më flagrante të konstatuara janë: parakalimet e gabuara; shpejtësia tej normave; drejtim i mjetit në gjendje të dehur”.
Një familje me katër anëtarë u shua mëngjesin e së premtes në aksin Levan-Vlorë, pasi u përfshinë në aksident. Goditja e fortë rezultoi fatale për dy prindërit dhe vajzat e tyre. Viktimat e këtij aksidenti janë Eduart Gushi, 44 vjeç, Silvana Gushi, 33 vjeçe. Anastasia Gushi, 14 vjeçe dhe Eva Gushi, 9 vjeçe.
