Një aksident i rëndë rrugor është shënuar pasditen e kësaj të mërkure në zonën e njohur si “Shkalla e Tujanit”, në periferi të Tiranës. Dy automjete janë përplasur me njëra-tjetrën, duke shkaktuar humbjen e jetës së një të riu 29-vjeçar.
Sipas informacionit zyrtar të policisë, ngjarja ndodhi rreth orës 16:55. Automjeti që drejtohej nga shtetasi O. N., rreth 35 vjeç, është përplasur me një tjetër automjet që drejtohej nga M. Sh., 29 vjeç. Si pasojë e përplasjes së fortë, drejtuesi 29-vjeçar ka ndërruar jetë.
Gjithashtu, është lënduar edhe pasagjeri në makinën e viktimës, shtetasi H. L., rreth 25 vjeç, i cili ndodhet aktualisht në spital nën kujdesin e mjekëve.
Policia dhe grupi hetimor ndodhen në vendngjarje dhe po punojnë për zbardhjen e plotë të rrethanave të këtij aksidenti fatal.
