Aksi rrugor Fushë Krujë-Milot është përgjakur në mesnatë nga një aksident I rëndë me pasoja tragjike.
Dy makina janë përplasur me njëra-tjetrën, duke shkaktuar vdekjen e 4 personave.
Bëhet e ditur se si pasojë e aksidentit në aksin Fushë-Krujë-Milot, kanë humbur jetën Alfred Dika, 39 vjeç, dhe Artan Alushi, 30 vjeç. Ndërsa për shkak të përplasjes së rëndë kanë ndërruar jetë edhe dy pasagjerët 20-vjeçari Shkumbin Brati, dhe Almenia Karaj,16 vjeçe.
Të dy pasagjerë në mjetin që drejtonte Alushi, ndërsa e plagosur ka mbetur një 34-vjeçare, e identifikuar me iniciale R. H., e cila ndodhet në spitalin e Traumës, deri më tani jashtë rrezikut për jetën. Dyshimet paraprake i hedhin fajet tek shpejtësia e madhe e dy mjeteve dhe tentativa e gabuar për një parakalim, duke bërë në fakt mjetet të përplaseshin kokë më kokë. Ndërkohë që grupi hetimor ndodhet në vendngjarje dhe po punon për sqarimin e rrethanave të aksidentit.
Njoftimi i policisë:
Rreth orës 00:15, në aksin rrugor Fushë Krujë-Milot, një automjet me drejtues shtetasin A. D., 39 vjeç, është përplasur me automjetin me drejtues shtetasin A. A., 30 vjeç. Si pasojë e përplasjes kanë ndërruar jetë të dy drejtuesit e mjeteve dhe dy pasagjerët, shtetasit Sh. B., 20 vjeç, dhe A. K.,16 vjeçe, që ndodheshin në automjetin që drejtonte shtetasi A. A. Gjithashtu, është dëmtuar shtetasja R. H., 34 vjeçe, pasagjere në automjetin që drejtonte shtetasi A.A., e cila ndodhet në spital nën kujdesin e mjekëve, jashtë rrezikut për jetën.
Grupi hetimor ndodhet në vendngjarje dhe po punon për sqarimin e rrethanave të aksidentit.
