Një aksident masiv ka ndodhur pasditen e sotme në aksin Drashovic-Pëshkëpi në qytetin e Vlorës, ku janë përfshirë disa automjete dhe sipas informacioneve paraprake, raportohet për 5 të lënduar.
Fillimisht, janë përplasur dy automjete, njëra tip “Benz” me targa AA502VC dhe një tjetër tip “Volsvagen” me targa AA827VP dhe menjëherë pas tyre është përfshirë në aksident edhe një makinë tip “Toyota” me targa AA909SK.
Në vendngjarje u nisën tre ambulanca dhe forca të shumta policie, të cilat po hetojnë rreth zbardhjes së plotë të ngjarjes, ndërsa shkaku i aksidentit është bërë shpejtësia tej normave të lejuara.
Të lënduar kanë mbetur 3 anëtarë të së njëjtës familje që ndodheshin në “Benz” dhe dy drejtuesit e dy automjeteve të tjera.
Të plagosurit janë dërguar në spital për të marrë ndihmën mjekësore, ndërkohë që ndodhen jashtë rrezikut për jetën.
Aksidentet rrugore në vendin tonë vijojnë të shënojnë bilance negative, pasi vetëm në muajin e parë të 2020 janë shënuar të paktën 506 aksidente dhe 16 viktima.
