Një aksident i rëndë ka ndodhur mëngjesin e sotëm në autostradën A1 në Itali, në segmentin midis Arezzos dhe Firences, ku një kamion u përplas me disa automjete të ndaluara për shkak të një bllokimi trafiku.
Si pasojë e përplasjes së fuqishme, tre persona humbën jetën dhe 15 të tjerë mbetën të plagosur.
Ngjarja ndodhi pak para orës 11:00, kur trafiku në të dy drejtimet e autostradës ishte bllokuar. Kamioni, që nuk kishte mundësi të frenonte në kohë, goditi një seri automjetesh të ndaluara, përfshirë një kamion tjetër, një makinë me karvan, një autobus turistik dhe një ambulancë.
Në ambulancë ndodheshin një pacient 75-vjeçar dhe dy infermierë, të cilët fatkeqësisht humbën jetën në vendin e ngjarjes pas goditjes së dhunshme. Automjeti u shtyp nga përplasja dhe më pas u përfshi nga flakët, të cilat u shuan në kohë nga shoferë të tjerë që ndodheshin pranë vendit të aksidentit.
Në total, 15 persona mbetën të plagosur, mes tyre një në gjendje kritike i shtruar në spitalin Careggi të Firences, katër të tjerë me lëndime serioze dhe pjesa tjetër me dëmtime më të lehta.
Një dëshmitar okular, avokati Paolo Romaglioli nga Arezzo, tha për mediat italiane se i shpëtoi mrekullisht aksidentit. “Kamioni goditi një automjet tjetër të madh, pastaj ambulanca u shtyp plotësisht. U përfshi nga flakët, por disa shoferë arritën ta shuanin zjarrin para se të përhapej më tej,” rrëfeu ai.
Autostrada A1 qëndroi e mbyllur për disa orë, ndërsa policia dhe ekipet e emergjencës punuan në vendngjarje për të menaxhuar situatën dhe për të sqaruar shkaqet e sakta të aksidentit tragjik.
