Një aksident automobilistik ka ndodhur këtë mbrëmje në afërsi të shkollës “Vasil Shanto” në Tiranë. Sipas policisë, një drejtuese mjeti ka dalë nga rruga e ka përfunduar në korsinë e stacionit të autobusit, ku ka lënduar dy këmbësorë. Këmbësorët janë dërguar në spital, e janë jashtë rrezikut për jetën.
Njoftimi i policisë:
“Tiranë/Informacion paraprak
Më datë 15.05.2021, rreth orës 20:55, në Vasil Shanto, mjeti me drejtuese shtetasen F. Z., 47 vjeçe, ka dalë nga rruga duke përfunduar në një stacion autobuzi. Si pasojë ka aksidentuar dy këmbësore të cilat u dërguan në spital, për të marrë ndihmë mjekësore, jashtë rrezikut për jetën. Grupi hetimor ndodhet në vendngjarje dhe po punon për zbardhjen e rrethanave të ngjarjes”.
Të plagosurit aktualisht ndodhen në spitalin e Traumës për të marrë ndihmën mjekësore, por gjendja e tyre shëndetësore është e qëndrueshme. Ndëra drejtuesja e automjetit është në gjendje shoku për shkak të aksidentit sapo të qetësohet ajo do të merret në pyetje nga policia.
Gjithashtu, gruaja do t’i nënshtrohet testit të alkoolit. Për fat të mirë, në bar kafe nuk ka pasur njerëz të ulur jashtë pasi mund të kishim pasur edhe viktima. Ndërkohë, specialistët do të sekuestrojnë kamerat e sigurisë të lokalit ku ndodhi ngjarja për të përcaktuar shkakun e aksidentit dhe do të vlerësohet nëse do të pritet fletë-arresti për 47-vjeçaren, e cila mund të akuzohet për shkelje të rregullave të qarkullimit rrugorë me pasojë plagosjen e lehtë të dy personave.
