Një aksident i rëndë ka ndodhur pak minuta më parë në aksin nacional Korçë-Pogradec, në afërsi të vendit të quajtur Ura e Bulgarecit, ku një automjet ka përplasur një fëmijë 12-vjeçar, i cili po lëvizte po biçikletë.
Sipas informacioneve paraprake, 12-vjeçari ndodhet në gjendje të rëndë për jetën në Spitalin rajonal të Korçës, teksa bëhet me dije se drejtuesi i mjetit OPEL është punonjës policie në komisariatin e Maliqit, ndërsa në momentin e aksidentit ka qenë jashtë shërbimit.
Policia vijon hetimet në vendin e ngjarjes për zbardhjen e plotë të aksidentit, ndërsa ka bërë shoqërimin e drejtuesit në polici për sqarimin e rrethanave të kësaj ngjarje të rëndë.
Njoftimi i policisë
Korçë/Informacion paraprak
Më datë 30.04.2020, rreth orës 15:40, në aksin rrugor Korçë-Maliq, pranë fshatit Bulgarec, shtetasi D. L., duke drejtuar mjetin tip “Opel” dyshohet se është përplasur me një biçikletë që lëviste një shtetas rreth 12 vjeç, i cili aktualisht ndodhet në Spitalin e Korçës, për ndihmë mjekësore.
Drejtuesi i mjetit ndodhet në Komisariat, ku po kryen veprimet e mëtejshme procedurale. Grupi hetimor po punon për zbardhjen e rrethanave dhe përcaktimin e shkaqeve të aksidentit.
