Mëngjesin e sotëm është përgjakur aksi rrugor Tiranë-Elbasan.
Dy mjete janë përplasur mes tyre dhe për pasojë ka mbetur i vdekur njëri prej shoferëve, dhe e plagosur një tjetër pasagjere. Ndërkohë që grupi hetimor po punon për zbardhjen e rrethanave të ngjarjes.
“Më datë 23.05.2023, në aksin rrugor Tiranë – Elbasan, automjeti me drejtues shtetasin E. Q. është përplasur me automjetin me drejtues Sh. K.
Si pasojë e aksidentit, ka humbur jetën shtetasi Sh. K., 55 vjeç dhe është dëmtuar pasagjerja që udhëtonte në automjetin e tij, shtetasja V. K., e cila ndodhet nën kujdesin e mjekëve. Grupi hetimor po punon për sqarimin e rrethanave të aksidentit”, thuhet në njoftimin e Policisë së Shtetit.
Vlen të theksojmë se aksidentet rrugore gjatë vitit 2022 ruajtën një tendencë rënëse muaj pas muaji duke bërë që në finale numri i tyre të jetë 15.3 për qind më i ulët sesa viti paraardhës. Ndërkohë për gjithë vitin 2022, numërohen 1.165 aksidente rrugore nga 1.376 aksidente, të ndodhura në vitin 2021. Shifrat zyrtare të aksidenteve rrugore të publikuara nga Instituti i Statistikave tregojnë se në muajin e fundit të vitit dhjetor 2022 numërohen 105 aksidente rrugore nga 119 të ndodhura në të njëjtën periudhë të një viti më parë. Mësohet se numri i aksidenteve rrugore është ulur me 11,8%.
